يا ليد أنا مش دحباشي إندكو الجواز

رشدي الكوشاب
الجمعة ، ١٦ أغسطس ٢٠١٩ الساعة ٠١:١٣ مساءً
مشاركة |

 

الأخوة في المجلس الإنتقالي - عدن 
موضوع اسم الدولة الجنوبية ؛ واضح ..
موضوع العلم و النشيد الوطني ؛برضه سهل
موضوع العُملة النقدية ؛ برضه سهل 
ممكن لو تكرمتم تعريف من هو الجنوبي ؟
هل هناك سِمات أو صفات معينة للجنوبي ؟
هل أستطيع تمييز الجنوبي من الملامح أو اللغة أو الملابس ؟
هل يستحق الجنسية الجنوبية أي مواطن لديه هذه الشهادات أو بعضها ( ميلاد - إبتدائية - إعدادية - ثانوية - جامعية - بطاقة شخصية - زواج ) صادرة من عدن ؟
هل المولود في عدن و عايش فيها اكثر من 50 عام ، يُعتبر جنوبي ؟

نرجوا ممن لديه إجابات ان لا يبخل علينا بالرد منشان ما يجيش يوم و أغلط و مدريش كيف أنادي الشخص اللي قدامي !!!
يعني أقوم اودف و اقول لواحد يا جنوبي ، يقوم يزعل و يقلب صورته و بقولي عيب أستحي .. ما تشوف زي الناس !! انا شمالي .
و يطلع دمه حامي و تقع مدراجه و تلول بيننا وتكبر المشكلة و الشمالي يستنجد بأصحابه و الجنوبي يستنجد بأصحابه وتتطور الامور و تتدخل سفارتي الشمال و الجنوب .... يا الله شل لك بعدين ، الخارجية الشمالية تستدعي السفير الجنوبي و الخارجية الجنوبية تستدعي السفير الشمالي ..
بعدين المواقع الإعلامية تلاقي له شغله و تحاري النار و تحصل مضايقات للمغتربين الشمالين في الجنوب و مضايقات للمغتربين الجنوبين بالشمال .. يمكن بعدين تتطور الامور ويتم تطبيق نظام الكفيل بالدولتين و بيقع شغل في تهريب البطاط و البصل و الثوم و الجرجير  والشكليت والحليب  وووو....
وتلاقي حرس الحدود في منفذ إمبعاله كل وقت و هم اما يقبضوا على لاجئين أويقوموا بعملية إحراق كمية من الخضراوات و الفواكه و الملابس والقيتان المهربة .
والعصيد و السلته في الجنوب فقط خميس و جمعه وتتم المعاملة بالمثل وتعلن حكومة الشمال مقاطعة الزربيان والصيادية والعُشّار .
لا وكمان عاد باقي الطلاب الشمالين بجامعة عدن و حضرموت و الجنوبين بالجامعات الشمالية بتكون رسوم الدراسة بالدولار باعتبارهم أجانب .
 و يا زعيمه جُرّي الزمبوق .
المهم في النهاية ، المستفيدين طرفين فقط
الدكاكين اللي في كرش و الشريجة وبيقع سوق حره وشغل لما النُخر .. 
وعظم الله أجر المسؤولين الجنوبين التابعين للشرعية و أولهم خطيب الساحة الإخواني عبدالله العليمي الذي يطالب بسجن علي البيض و حيدر العطاس بخطبته التحريضية ( تلاقحوا ) .

#الله#الوطن#
رشدي الكوشاب

مساحة اعلانية